Бичлэг
Бичсэн Jintana »
Сайн байна уу? Сайхан блог минь. Сайн байна уу? Нүүр тулж танилцсан, танилцаагүй найзууд минь. Пээ юу болоод өнгөрөв дөө. Амьдрах шиг л боллоо энэ хэдэн жилд хэхэ. Хамгийн чухал сэдвээсээ эхлэе. Миша бид 2 хамт амьдарсаар л байна. Одоо бараг үхтэрээ хамт байна байх. Мань хоёр зөндөө юм хийж бүтээлээ бас зөндөө их асуудал, зовлонг хамт тууллаа. Хүүхэдтэй болох гэж их хичээлээ. Өсөлтгүй боллоо, зулбалаа, мэс засалд орлоо. Сүүлдээ үр шилжүүлэхээр явлаа. Даавраар бөмбөгдүүлээд, гэртээ багтахаа больтлоо таргаллаа. Одоо тээгч эхийн асуудал үүслээ. Хамгийн сүүлд би төрсөн дүүгээрээ тээлгэнэ, Миша өөрийн дүүгээр тээлгэнэ гэдэг дээр хэрэлдэх шив. Өнөөдөр мань эр ковидоос хойш анх удаа Хятад явлаа. Явангуут нь би эрх чөлөө мандтугай гээд дураараа сайхан уугаад, асуулт энэ тэр орсон шиг өчигдрийн өөрийгөө хайж жаргаж байна даа. Дараагийн чухал сэдэв манай Лулу нохой байна. Цаад чинь ээж болсон. 5 гөлөг төрүүлээд, 2 нь өөр эзэнтэй, жаргалтай сайхан амьдарч байгаа. Нэг гөлөг нь Ховдын эмч найз дээр минь очсон боловч ковидоос болоод улаан бүст ажиллаж байгаа найз маань харах аргагүй болоод, нэг жилийн дараа эргэж ирсэн. Ингээд манайх 2 нохойтой боллоо. Нэг нь хөдөө агаарт байг гэсэн нэрийдлээр авчраад орхисон. Нэгийг нь дүүгийнх авсан, хөдөө хамт байдаг учраас одоогоор 4 нохойтой айл болсон байна даа. Тэрний дараагийн сэдэв би гэнэт кареер хөөгөөд. Чулуу өшиглөөд л, хувь заяандаа бага зэрэг гомдоод л, Лулуг баалгаж шээлгээд явж байсан багш маань яриад, ДЭМБ дотоодын зөвлөх чиний мэргэжлээр хайж байна. Чамайг санал болголоо, 5 жилийн төлөвлөгөө боловсруулах ажил байгаа, цалин дажгүй гэхээр нь яг хэдэн төгрөг вэ гээд хөлсний ажил хийе гээд орчихлоо. Ковидын ачаар гэх үү зүүмээр ажлаа хийж болдог юм байна. 3 сарын гэрээ байгуулаад орсон чинь 3 жил ажиллаад наасан. Зөндөө их юм сурлаа, базарваань. Түмэн завгүй. Одоо бүр Монгол улсын мэргэжлийн эмч нарын нийгэмлэгийн тэргүүн нь болчихсон, бодлого тодорхойлоод явж байна. Ээж болж чадахгүй юм бол ядаж кареер хөөе дөө, тэнгэр минь гэж л бодсон. За тэгээд энэ жил бүр зориуд зав гаргаад, 10 жилийн уулзалтанд очлоо. Күүл нь күүлээрээ л байдаг юм байна. Хэн болохыг амьдрал заадаггүй юм байна. Анхнаасаа мөн чанар нь ямар байсан тэр хэвээрээ л байдаг юм байна гэдгийг бүрмөсөн батлан харууллаа. Би харин хүн өөрчлөгдөнө гэж байхгүй дээ гэж боддог байсан л юм. Тэгээд мэдээж далчигнасан гарууд нь далчигнаад, ядаж байхад Монгол улс нь хэн их далчигнаж байна, тэрэнд боломж олгоод, нөгөө хэд нь зүгээр аргалаад аргацаагаад шийдээд сурчихсан, дүрдээ итгэчихсэн. Намайг загнаж үзэж байх шиг, битгий хуцаа чи, тасарч унахгүй шиг өнгөрвөл их юм, ажил мажил хийж чадахгүй, уулаасаа сэтгэлээ сэргээх гэж ирсэн юм гээд хэлчихсэн чинь фэйсбүүк ангийн групп дээр ангийн даргын зохион байгуулалт муу байлаа энэ тэр гэж нэхэл хатуутай бичиж байх шиг. Тэгэнгүүт нь тухайн үед ангийн дарга хийж та нарын учрыг олж байсанд талархаж яваарай, насаараа ангийн дарга байна гэж юу байдгийн, битгий хуц гээд группээс нь гарчихсан. Ингээд 10 жилийн уулзалт бүтэл муутай, тэгсэн үргэлжлүүлээд бага ангийн хүүхдүүд уулзалт хийнэ гэнээ. Ангийн багш маань мэс засалд ороод ирж чадаагүй, багшийгаа баярлуулж уулзая гэж бичээд л байна. Багш "хайр" дараад байдаг. Миний багш ээжийг маань өөд болох үеэр биднийг бүгдийг нь дуудаж, цуглуулж ээжийг амьд дээр уулзуулсан ачтай хүн. Ээж өнгөрөөд нэг ч удаа уулзаагүй зөнгөр гар учраас одоо уулзах ёстой гэж өөртөө хэлээд л байгаа. Ангийн дарга зохион байгуулаарай гэсэн, сая дунд ангийн уулзалтаас бага сага хэрүүл мэдэрсэн зарим нөхөд Жинтана зүгээрээ ажлаа бод, мань хэд зохион байгуулая, харин заавал ирээрэй гэсэн. Очно доо хэхэ. Иймэрхүү амьдарч байна. Миша дэлгүүр орно юу захих уу гэхээр нь юу ч хэрэггүй ээ гэсэн чинь ядаж бандаш, подволкоо солихгүй юм уу, урагдсан хэдэн юм харагдсан гэхээр нь за тэгээд авмаар санагдвал авахгүй юу даа л гэлээ. Эко амьдрах гэж шийдээд нэг хувцсаа угаангаа 3-6 сар өмсдөг болоод удаж байна. Хурал цуглаанаар өмсдөг 2 ээлжийн пиджактай. 2-3 жил нэг хувцастайгаа очдог болж байна. Дараагийн сэдэв материаллаг байдал үлдсэн байна. Анх удаа цалингийн хадгаламж нээж үзсэн. Гоё байдаг юм байна. Одоо нэг дургүй хүрвэл үүргэвчээ үүрээд, пасспортоо аваад гарахад 2 орноор үүргэвчтэй аялал хийх зиндааны мөнгө цуглуулсан. Энүүгээрээ маш их бахархаж байгаа. Миша маань бас зөндөө хичээж ажилласан. Бид 2 хотын төвд хуучин байр засч орсон. Бас хөдөө 1000 мод тарьсан газраа эхлээд тог татсан. Ноднин жил жижигхэн байшин барьсан. Одоо босс болсон болохоор хотын ажлыг бөөгнүүлж, нэг ирж хэд хоног хийчихээд, хөдөө гэртээ харина. 4 нохойтойгоо хамт агаарт сайхан л амьдарч байна даа. Уйлсанаа, ядарсанаа, цөхөрсөнөө, өвдсөнөө хүн туулаад гарчихаар мартдаг юм байна. Инээсэнээ, итгэсэнээ, ирээдүйгээ бичих нь илүү сайхан байна.
yamar turliin nom shiddegiin ta?
